Выстава мастацкай фатаграфіі
Сяргея Плыткевіча “У родным краі”
19.03 –17.04.2024
У родным краі ёсць крыніца
Жывой вады…
М.Багдановіч
Беларускі фатограф Сяргей Плыткевіч вядомы сваімі фантастычнымі здымкамі прыроды Беларусі і нашых гістарычных каштоўнасцей. Ён нарадзіўся ў 1963 годзе, у в.Ванюжычы Петрыкаўскага раёна. Вучыўся ў Полацкім лясным тэхнікуме і Беларускім дзяржаўным універсітэце. Дзіцячае захапленне фатаграфіяй стала прафесіяй і прызваннем, прынесла поспех сярод прафесіяналаў. “Гуру фатаграфіі” і “лепшы фатограф дзікай прыроды” – менавіта так гавораць пра яго сябры.
Сяргей Міхайлавіч з’яўляецца заснавальнікам сайта planetabelarus.by і выдавецтва «Рыфтур», дырэктарам Рэспубліканскага фонду развіцця турызму і падтрымкі дзікай прыроды «Планета без межаў». Ён – аўтар шматлікіх фотаальбомаў, прысвечаных беларускай прыродзе, у іх ліку - альбомы «Мая Беларусь», «Беларуская экзотыка», «Дзікае жыццё ў цэнтры Еўропы», «Ад Полацка пачаўся свет», «Нечаканая Беларусь», «Запаведная Беларусь», «Чырванаборская пушча» і інш.
Сяргея Плыткевіча вылучае зварот да гістарычнай памяці народа і любоў да роднай зямлі. Любоў да ўсяго, што напаўняе сабой планету Беларусь – ад самай маленькай кветачкі, прадстаўнікоў дзікай прыроды да велічных сведкаў нашай мінуўшчыны і здабыткаў сучаснасці. Менавіта гэтыя яго праекты прадстаўлены на выставе ў Літаратурным музеі Максіма Багдановіча.
Уваход вольны.
Літаратурны музей Максіма Багдановіча
Мінск, вул. М.Багдановіча, 7а
Тэл.: +375 17 355 22 95
